Mar 15 | MHL | STEP | Aria uuriw epa wiimeya wi pris woos mua, wi owow woos mua ne wi sira amis mua wiam aawep Yeesus ifakimowa nain opora aakunemik. Wi teeria nain Kaunsel Maneka wia naimik. Aakunep-puap o aawep kaikap pikiwep Pailat wapena-pa wuamik.

Mark 15

Yeesus anim onom maneka Pailat wiar pikiwemik

(Matiu 27.1-2 ne 27.11-14, Luk 23.1-5, Yon 18.28-38)

1 Aria uuriw epa wiimeya wi pris woos mua, wi owow woos mua ne wi sira amis mua wiam aawep Yeesus ifakimowa nain opora aakunemik. Wi teeria nain Kaunsel Maneka wia naimik. Aakunep-puap o aawep kaikap pikiwep Pailat wapena-pa wuamik. 2 Ne Pailat-ke o nokarek, “No mae, no wi Yuuda owow saria maneka-ki?” Naeya maek, “Opora pepek nan maen.”

3 Ne wi pris woos mua-ke wadol opora unowa ifemik. 4 Naapeya Pailat-ke kiiriw nokarek, “Opor pina unow akena nefa mikimik nain me miimin-i? No opora kuisow-ko me wia kiripominan-i?” 5 Naap maakek-na opora kuisow-ko me wia kiripomak. Naapeya Pailat kema unu-unowa wuak.

Yeesus nomokow moke-pa umowa maemik

(Matiu 27.15-26, Luk 23.13-25, Yon 18.39 ne 19.16)

6 Aria Pailat anane Pasowa maapora-pa sira feenap oniya, wi mua koora ekap ikemik nain wi owow mua kookalowa-pa mua kuisow unuma wiar unufiwkin piipuiya. 7 Aria iir oko-pa wi Yuuda mua wi Rom irakow mua wiamiya irakep mua wia ifakimep koora ekap ikemik. Wi teeria nain mua oko unuma Barabas.

8 Aria wi emeria mua Pailat wiar ekapep fiirimep maakemik, “No sira anane onin naap one. Mua kuisow-ko piipueya orainok.” 9 Ne Pailat-ke maek, “Yo niena Yuuda owow saria maneka fain piipuinen-i?” 10 Pris woos mua kema wiar amisarek, mua unowa Yeesus ookiwkin kema bagiwirap opora-pa wuamik. 11 Naapeya Yeesus piipuinen naep onak. Ne wi pris woos mua-ke yakeyak wia maak-iwamik, “Ni Barabas unuma unufeka, naeya o piipuinok.” Naap wia maakiwkin Barabas unuma unufamik.

12 Ne Pailat-ke kiiriw wia nokarek, “Ne niena Yuuda owow saria maneka naiman fain kamenap oninen?” 13 Naeya kerew akena faremi maemik, “Nomokow moke-pa uminok!” 14 Naeya kiiriw wia nokarek, “Moram, o pina kain onak?” Ne wia, wi unow maneka piikirami kerew faremi maemik, “Nomokow moke-pa uminok akena!” 15 Naeya Pailat-ke wi yakeyak kema siinuk naep Barabas piipuak. Ne Yeesus wi ami mua wapena-pa wiar wueya saru-pu-puukap pikiwemik, nomokow moke-pa wuowa naep.

Wi ami mua Yeesus firekami amap-niiremik

(Matiu 27.27-31, Yon 19.2-3)

16 Ne aria wi ami mua-ke Yeesus aawep wiena pika maneka kemena pikiwemik. Pikiwemi wi ami mua papako wia fariwkin unowiya kereremik. 17 Ne ona mia suuwowa wiar iirarep mia suuwowa oka aawep wuomamik. Ifar suusa aawep wasiep ikiwosa-pa orowawamik. 18 Naap onap amap-niiremi wapena iinan siikap maemik, “Oo, maneka, wi Yuuda owowa saria!” naap maemik. 19 Ne ufua kuumiw woosa-pa arufami opeka waremik. Ne amap-niiremi keema muuna miiwa-pa mikap maemik, “Oo, owow saria maneka.” 20 Naap onap-puap mia suuwowa oka nain kiiriw iirarep ona mia suuwowa nainiw suuwomamik. Naap onap-puap nomokow moke-pa wuau naep pikiwemik.

Yeesus nomokow moke-pa patotiw waremik

(Matiu 27.32-44, Luk 23.26-43, Yon 19.17-27)

21 Aria wi Yeesus pikiwem-ikok Saimon miirowamik. Mua nain owowa Sairini, ne os pun Alesanda Rufus ikos wiawi-ke. O Yerusalem ikiwem-ikaeya miirowamik. Urufap wi ami mua-ke Yeesus asipinok naep nomokow moke akuawowa suuwamik. 22 Ne wi Yeesus epa unuma Golgota naimik nain pikiwemik. Unuma nain kemena feenap, “I mua woos oona” naimik. 23 Ikip epa nan fuunep wain eka masia onaiya kiripap-puamik nain onakiwkin miatinek.

24 Ne o mia suuwowa iiwawun wiar iirarep opap nomokow moke-pa patot waremik. Ne mia suuwowa wiar sererku naep satu niiremik. Niirep mua kuisow kuisow mia suuwowa wiar aawu naep. 25 Uuriw ama ikur okaiwi-pa erepam naap nomokow moke-pa wuamik. 26 Ne o opora-pa wuamik nain opor onoma siisimep ona woos erekina-pa wuamik. Opora feenap siisimemik, “WI YUUDA OWOW SARIA-KE.”

27 Aria ikum mua wiam erup pun nomokow moke-pa patot wiaremik, oko Yeesus aken ekeria-pa wuamik, ne oko asow ekeria-pa.[ 28 Mua Maneka opora iiriw siisimemik nain aakisa maken akena imenarek. Feenap, “Krais-na wi mua samora teeria-pa wuap maemik.”] 29 Aria wi emeria mua nan irap erap naem-ikemik nain-ke urufap imakuna pirip-poromi firekami maemik, “Aa. Iiriw nos-ke maen, ikoka tempel koora maneka nain teekap fofa arow muuta enuma kuainen naen. 30 Aria aakisa nena name asipap nomokow moke-pa ikon nain ore.”

31 Ne wi pris woos mua pun o firekami wi-wieniw aakunemi maemik, “Mua oko wia asipam-ikua, ne aakisa ona wame asipowa me pepek. 32 O naap maek, ‘Yo Krais-ke, yo Isrel owow saria maneka-ke.’ Owow saria manekiya-na nomokow moke-pa oreya urufap makena nefa naiyen.” Aria pina mua wiam erup eena o wameiya-pa nomokow moke-pa patot wiaremik nain pun o firekamik.

Yeesus umok

(Matiu 27.45-56, Luk 23.44-49, Yon 19.28-30)

33 Aria unun ama naeya miiw maneka iiwawun kokoma-ke muep ikaeya ikip ama arow arek. 34 Naap ikok ikip urera ama arow-pa Yeesus-ke Mua Maneka faremi maek, “Eloi, Eloi, lama sabaktani!” Opora nain kemena feenap, “Yena Mua Maneka, yena Mua Maneka, no moram efa piipuan?”

35 Naap maeya wi wameiya-pa iimarep ikemik nain-ke miimap maemik, “Ni miimeka, o Elaiya fariya.” 36 Ne mua oko karuw-ikiwep wauroma aawep eka masia-pa suuwap kuuma kapa-pa mikap ninimekam naep onami maek, “Naap iki-ikainok. Uru-urufap, Elaiya ekapep asipiya nain-ko urufikua!” Naap aakunem-ikaiwkin Yeesus kerew akena farep-puap umok.

38 Aria konim maneka tempel koor kemena-pa sererep ikua nain gone-pariw perenep kakawa erup arek. 39 Ne ami woos mua o wameiya-pa iimarep ikua nain-ke naap urufap maek, “Makena ya, mua fain Mua Maneka Muuka-ke!”

40 Aria emeria papako lawisik epasia-pa ikok naap urufam-ikemik. Wi eena iiriw o Galili-pa ikua nain o ookap kakaltam-miok Yerusalem ekapep fan ikemik. Emeria wiam arow nain unuma feenap: Maria, ona owowa Makdala, oko pun Maria, Yems gelemuta Yoses ikos wiena onak-ke, ne oko Salome.

Yeesus soopamik

(Matiu 27.57-61, Luk 23.50-55, Yon 19.38-42)

42 Aria Arimatia mua oko unuma Yosep, o wi Yuuda Kaunsel teeria-ke. Mua nain sira eliwa, ne o Krais ekapowa nain ikumam-ikua. Feenap, “Uurika Sabat fofa-ke, aakisa maa unowa saliwikua.” Naap maep Pailat me keker opak. Urera wiar ikiwep nokarek, “Yo Yeesus sawi napuma eliw aawep soopinen-i?” 44 Pailat Yeesus iiriw umok nain miimap soranek. Ne makena amisarekam naep ami woos mua farep nokarek. 45 Ne os-ke maakek, “Iiriw umok.” Naeya Yosep maakek, “Eliw, no aawep pikip soope.”

46 Naeya Yosep ikiwep konima kia maala sesenarep ekapep sawi napuma nomokowa-pa amaporop konimiw wasiep pikiwep nomon ona-pa wuak. Wuap-puap nomon ebebiria maneka suuw-ekap omopora ofomak. 47 O naap onam-ikua nain wi emeria wiam erup, Makdala owow emeria Maria, ne Maria oko, Yoses onak, wi naap urufam-ikemik.